Céard é seo?

An t-eagrán is déanaí

Cartlann

Comórtas

Ordú

Teagmháil

Cóipcheart

Údar-lann

Aíonna

Urraíocht

Naisc

Dán le
le Biddy Jenkinson

An Bandia Bándearg

I gcroílár na bhFlaitheas
Tá an Mór Ríon ag folcadh,
Ag déanamh boilgeog.
Úsc ríoga, aer, uisce,
ionramháil….
Éiríonn féidireachtaí.
Uaireanta táthaíonn dhá bhoilgeog dá chéile.
Nuair a éiríonn an leacht sa dabhach
ábhairín leamh,
músclaíonn an Bhanríon é
le suathadh géag.
Céard tá sa dé
ach aer, uisce agus ionramháil?
Lúcháir na Banríona:
Déanamh boilgeog.
Déanann sí gach bolgán
a iniúchadh
– mo chuimhne
mo dhearmad
an bhfaca mé cheana thú? —
sula sníonn sé chun siúil,
aghaidh na Banríona air.
Cumha na Banríona,
Scáil idir dhá ghile.
Aoibh na Banríona,
Gile idir dhá scáil.
Tharlódh, lá éigin, go teagmhasach,
go ndéanfaidh sí boilgeog feasa,
nó go gcuimhneoidh sí ar rud éigin
lasmuigh dá folcadán
agus go nginfear é.
Nuair scaoileann sí broim,
saolaítear gliogar.
Thit néal codlata uirthi,
faid neamhní amháin
milliún bliain ó shin
— nó anois beag —
agus d’éirigh an t-uisce ábhairín fuar.
Tuigeann sí ó shin
teas agus fuacht.
Dá mbeadh cuimhne ag an mBanríon
Thiocfadh tuirse uirthi,
Dá mbeadh comhaireamh aici
Thiocfadh lagmhisneach.
Dá dtógfá as a folcadán í
Dhéanfá míol mór lom-bándearg-nocht di.
Dá gcuirfeá ceist uirthi
Dhéanfadh sí snaidhm na péiste
Ina craiceann,
Le teann sceimhle,
Agus d’imeodh sí as.
Cé iompróidh ár mBandia
Ar ghuaillí arda
Go brách na breithe?
Is trom Bandia i bhfad.
Is trom boilgeog i bhfad.
An té a bhriseann boilgeog
Múchann sé solas.
B’fhéidir go n-imeodh an Bhanríon as
— ar bhonn iomarcaíochta -
Dá nginfheadh dhá bhoilgín boilgín eatarthu.
Ceadaíonn beatha bás.
Ceadaíonn bás beatha.
Ceadaíonn féidireacht dán….
Dá dtabharfaí bun don bheith
Rath a chur fúithi féin
B’fhéidir, amach anseo,
go dtiocfainn féin i gceist
agus go scríobhfainn na bhéarsaí seo.
Pé rud a theagmhann
Ní le toil nó le neamhthoil na Banríona é.
Déanann an Bhanríon boilgeoga.
Níor ól sí; níor ith sí.
Níor fhliuch sí; níor chac sí
Riamh.
Chuimhneodh sé ar a leithéid. Is cinnte.
La Reine a moitié rouge
Dans le bain moussant,
Sfumata ceoigh lasmuigh de.
Déan trócaire ar ár mBandia
Ná hiarr uirthi
Dul thar a hacmhainní.
Boilsceann na beatha:
Bandia le hinchinn dearmaid, lánfhoirfe
a shéideann
— plub, plab — boilgeoga
agus an bás
mar dhuán alla
os a cionn
Ag faire ar a amas
chun teacht i gclí.

Feasta, Lúnasa 2007

Abhaile | barr | clár na míosa seo