Céard é seo?
An t-eagrán is déanaí
Cartlann
Comórtas
Ordú
Teagmháil
Cóipcheart
Údar-lann
Aíonna
Urraíocht
Naisc
Dánta le Colin Ryan
Cois trá
Sa gheimhreadh ab fhearr léi
an fharraige
í ag siúl na trá báine
i gcoinne na gaoithe dorcha
ag tnúth le hionsaí an dé
Seachain! a deireadh na faoileáin léi
is na glórtha báite
Seachain! a deireadh sí féin
is lorg a cos ag leá
tháinig an dia ina réabadh
á cloí le colg
rinneadh sáile den solas
is sáile dá cuid fola
í á bá ag grá na mara
sular tréigeadh í
Eilís Ní Cheallacháin in Hobart,
Ag teacht i dtír di bhraith sí
Van Diemen’s Land 1821
Sasanachas na háite
Londain bheag eile beagnach
murach íoróin na sléibhte
airgead falsa
a chuir an loch amach í
an fharraige ghlas ag slogadh
na staire
is an séan ag seadú
ina haigne
Contae an Chláir ina cheo
is Whitechapel á dhearmad
pé anbhás a thiocfadh feasta
níorbh fhiú léi í féin a chaoineadh
is a bróga go beo ar na clocha
le ceolta an dóchais
nárbh fhearr seo ná an chroch
a gealladh di lá gaoithe
Amharclann Fhobhailteach
É ina phrionsa an uair seo,
Prionsa
fear dílis míshásta uaigneach
is an bríste beagán rótheann air:
bheith ann nó gan a bheith ann
sin an cheist chéanna i gcónaí
is gan réiteach ag a leithéidí uirthi
maolán de bhaitsiléir
a stánann air ón scáthán
in éide bhreá bhrónach
(é ag cuimhneamh go fóill
ar an gcailín úd nach bpósfadh é)
b’fhearr leis páirt an chúirteora
a fhanann ar an gcúlstaighre
ag tnúth le cor sa scéal
anois tá an t-am tagtha:
an stáitse folamh, an scáil
is an scáthán roimhe amach
an bheatha is an bás
Banríon
A súile sa ghloine, an smideadh
is tinsil na corónach
í ina banríon i ríocht
a bhfuil siorradh isteach inti
rósanna feoite sa seomra sosa
is gúna seanchaite:
bean í atá idir dhá aois
is taithí aici ar aistíl na bhfear
(a mac ar seachrán sa chaisleán
ag beartú claímh)
aicise is fearr a fhios cén teir
a bhaineann le réimeas rí:
ní thiocfaidh sí slán ón mbreith:
éiríonn sí suas lena saol a léiriú arís
is na línte go beacht ina béal
ag cur na cinniúna in iúl
gach oíche go héag.
Feasta, Feabhra 2011